ನನ್ನ ಕವನ

ನನ್ನ ಎದೆಯ ಗೂಡಲಿ ಒಬ್ಬ ಕವಿ ಕವನ ಕಟ್ಟುತ್ತಿರಲು,

ನೀನು ಕಲ್ಪನೆಯ ಹೂದೋಟದಲಿ

ಕನಸುಗಳೊಂದಿಗೆ ಕಣ್ಣು ಮುಚ್ಚಾಲೆಯಾಡುತ್ತಿದ್ದೆ.

ಬಳ್ಳಿ ಹೂಗಳು ನಿನ್ನ ಮುಖ ಮರೆಮಾಡಿ ,

ನೀನು ನನ್ನ ಕಾಡಿಸುತ್ತ ಹಿಂದೆ ನಗುತಲಿದ್ದೆ .

ನಿನ್ನ ಕಣ್ಣುಗಳ ಮುಗಿಲ ನಕ್ಷತ್ರಗಳಲಿ ಹುಡುಕಿಕೊಂಡು

ನಿನ್ನ ಮುಗುಳ್ನಗೆ ಬೆಳದಿಂಗಳ ಬೆಳಕಲಿ ,

ನಾ ನಿನ್ನ ಕಾಣುವಾಗ ,

ನೀನು ಹಾದುಬಂದ ಮೋಡದಾ ತೆರೆಯಲಿ ಮರೆಯಾದೆ .

ಕರಗಲಿಲ್ಲ ನಾನು ,ನಿನ್ನ ಬೆರಗಿಗೆ ಕಾದೆ .

ನೀನೊಮ್ಮೆ ಎದುರಾದಾಗ ಬರೆಯಹೊರಟೆ ಕವಿತೆ

ಸಾಲುಗಳು ಬೆಳೆಯುವಲ್ಲಿ ಮುಂದಿನವುಗಳ ನೀನೆ ಹಾಡುತಲಿದ್ದೆ,

ನಿನ್ನ ಹಾಡಿಗೆ ಶ್ರುತಿ ಸೇರಿಸಲು ಪ್ರಯತ್ನಿಸಿ ನಾ ಸೋತಾಗ

ನೀನೇ ಶೃತಿಯಾಗಿ ಬಿಡುತ್ತಿದ್ದೆ